Hesabu Mlango 13 Numbers

Hesabu 13:1

Kisha Bwana akanena na Musa, akamwambia,

Hesabu 13:2

Tuma watu, ili waende wakaipeleleze nchi ya Kanaani, niwapayo wana wa Israeli; katika kabila ya baba zao mtamtuma mtu mmoja, kila mtu na awe mkuu kati yao.

Hesabu 13:3

Basi Musa akawatuma kutoka nyika ya Parani kama alivyoagizwa na Bwana; wote walikuwa ni watu walio vichwa vya wana wa Israeli.

Hesabu 13:4

Na majina yao ni haya; katika kabila ya Reubeni, Shamua mwana Zakuri.

Hesabu 13:5

Katika kabila ya Simeoni, Shafati mwana wa Hori.

Hesabu 13:6

Katika kabila ya Yuda, Kalebu mwana wa Yefune.

Hesabu 13:7

Katika kabila ya Isakari, Igali mwana wa Yusufu.

Hesabu 13:8

Katika kabila ya Efraimu, Hoshea mwana wa Nuni

Hesabu 13:9

Katika kabila ya Benyamini, Palti mwana wa Rafu.

Hesabu 13:10

Katika kabila ya Zabuloni, Gadieli mwana wa Sodi.

Hesabu 13:11

Katika kabila ya Yusufu, yaani, katika kabila ya Manase, Gadi mwana wa Susi.

Hesabu 13:12

Katika kabila ya Dani, Amieli mwana wa Gemali.

Hesabu 13:13

Katika kabila ya Asheri, Sethuri mwana wa Mikaeli.

Hesabu 13:14

Katika kabila ya Naftali, Nabi mwana wa Wofsi.

Hesabu 13:15

Katika kabila ya Gadi, Geueli mwana wa Maki.

Hesabu 13:16

Hayo ndiyo majina ya hao watu waliotumwa na Musa waende kuipeleleza nchi. Na huyo Hoshea mwana wa Nuni, Musa akamwita jina lake Yoshua.

Hesabu 13:17

Musa akawapeleka ili waipeleleze nchi ya Kanaani, akawaambia, Pandeni sasa katika Negebu mkapande milimani,

Hesabu 13:18

mkaitazame nchi ni ya namna gani; na watu wanaokaa ndani yake, kwamba ni hodari au dhaifu, kwamba ni wachache au wengi;

Hesabu 13:19

na nchi wanayoikaa kwamba ni njema au mbaya; kwamba wanakaa katika matuo au katika ngome;

Hesabu 13:20

nayo nchi ni ya namna gani, kwamba ni nchi ya unono au ya njaa, kwamba ina msitu au sivyo. Iweni na moyo mkuu, mkayalete matunda ya nchi. Basi wakati ule ulikuwa wakati wa kuiva zabibu za kwanza.

Hesabu 13:21

Basi wakapanda wakaipeleleza nchi toka jangwa la Sini hata Rehobu, mpaka kuingia Hamathi.

Hesabu 13:22

Wakapanda katika Negebu, wakafika Hebroni; na Ahimani, na Sheshai, na Talmai, wana wa Anaki, walikuwako huko. Nao Hebroni ulijengwa miaka saba kabla ya Soani wa Misri.

Hesabu 13:23

Wakafika bonde la Eshkoli, na huko wakakata tawi lenye kishada kimoja cha zabibu, wakalichukua kwa mti kati ya watu wawili; wakaleta makomamanga pia, na tini.

Hesabu 13:24

Bonde lile liliitwa bonde la Eshkoli kwa sababu ya hicho kishada walichokata huko wana wa Israeli.

Hesabu 13:25

Wakarejea baada ya kuipeleleza nchi, mwisho wa siku arobaini.

Hesabu 13:26

Wakaenda wakafika kwa Musa, na kwa Haruni, na kwa mkutano wote wa wana wa Israeli, katika jangwa la Parani, huko Kadeshi; wakawaletea habari, wao na mkutano wote, wakawaonyesha matunda ya nchi.

Hesabu 13:27

Wakamwambia wakasema, Tulifika nchi ile uliyotutuma, na hakika yake, ni nchi yenye wingi wa maziwa na asali, na haya ndiyo matunda yake.

Hesabu 13:28

Lakini watu wanaokaa katika nchi ile ni hodari, na miji yao ina maboma, nayo ni makubwa sana; na pamoja na hayo tuliwaona wana wa Anaki huko.

Hesabu 13:29

Amaleki anakaa katika nchi ya Negebu; na Mhiti, na Myebusi, na Mwamori wanakaa katika milima, na Mkanaani anakaa karibu na bahari; na kando ya ukingo wa Yordani.

Hesabu 13:30

Kalebu akawatuliza watu mbele ya Musa, akasema, Na tupande mara, tukaitamalaki; maana twaweza kushinda bila shaka.

Hesabu 13:31

Bali wale watu waliopanda pamoja naye wakasema, Hatuwezi kupanda tupigane na watu hawa; kwa maana wana nguvu kuliko sisi.

Hesabu 13:32

Wakawaletea wana wa Israeli habari mbaya ya ile nchi waliyoipeleleza, wakasema, Ile nchi tuliyopita kati yake ili kuipeleleza, ni nchi inayowala watu wanaoikaa; na watu wote tuliowaona ndani yake ni watu warefu mno.

Hesabu 13:33

Kisha, huko tuliwaona Wanefili, wana wa Anaki, waliotoka kwa hao Wanefili; tukajiona nafsi zetu kuwa kama mapanzi; nao ndivyo walivyotuona sisi.